Павлодар алюминий зауытында екі жұмысшы жарақат алды
Павлодар алюминий зауыты баспасөз қызметінің хабарлауынша, оқыс жағдай 16 мамыр күні болған.
Астана, NEGE. №3 пештің кептіру аймағын тазалау жұмыстары кезінде жиналған материал қабатының бір бөлігі опырылып түскен. Оқиға кезінде аталған аумақта күйежентектеу цехының екі қызметкері болған.
«Оқиға салдарынан диірмен машинисі оң жақ аяғынан жарақат алып, сүйегі сынған. Екінші қызметкер – агломераттаушыға – медициналық тексеру қорытындысы бойынша оң жақ аяғы жұмсақ тіндерінің жарақаты диагнозы қойылды. Оның сүйегі сынбаған, еңбекке жарамды», – деп хабарлады зауыт өкілдері.
Зардап шеккен қызметкерлерге жедел түрде алғашқы медициналық көмек көрсетіліп, облыстық ауруханаға жеткізілген. Сүйегі сынған диірмен машинисі ауруханаға жатқызылды.
Оқыс оқиғадан кейін Өнеркәсіп қауіпсіздігі саласындағы уәкілетті орган өкілдері зауыттың өндірістік алаңында тексеру жүргізді. Тексеру қорытындысы бойынша қауіпті өндірістік нысанда апат белгілері анықталмады.
