Пәкістанда содырлар 450-ден астам пойыз жолаушысын кепілге алды

Алматы, NEGE. Шабуыл кезінде жүргізуші жарақат алды. Шабуыл үшін жауапкершілікті «Белуджистанның азат ету армиясы» сепаратистік тобы мойнына алды. Олардың тарапынан әзірге нақты талаптар қойылған жоқ.

БАҚ-та тараған ақпаратқа сәйкес, экстремистер алдымен темір жолды жарып, кейін пойызға оқ жаудырған. Шабуыл кезінде алты әскери қызметкер қаза тапты. Содырлардың айтуынша, кепілге алынғандар арасында күштік құрылымдардың қызметкерлері бар, бірақ олардың нақты саны әлі белгісіз. Сондай-ақ топ мүшелері әйелдерді, балаларды және белуджи жолаушыларын тұтқыннан босатқандарын айтты.

«Белуджистан үкіметі төтенше шаралар қолданды және жағдайды шешу үшін барлық агенттіктер жұмылдырылды», - деді үкімет өкілі Шахид Ринд.

Басылымдар Jaffar Express пойызы Кветта қаласынан Пәкістанның Хайбер-Пахтунхва провинциясына бет алғанын атап өтті.

Естеріңізге сала кетейік, Белуджистан қазіргі Иран, Пәкістан және Ауғанстан арасында бөлінген, Иран үстіртінің шығысындағы аз қоныстанған аймақ. Оның тұрғындарының көпшілігі ирандық топтарға жатады, олардың мүшелері негізінен сунниттік исламды ұстанған. 

Белуджистандағы қақтығыс жарты ғасырдан бері жалғасып келе жатыр. Ол 1948 жылы Ұлыбритания аймақтан шыққан кезде Пәкістан мемлекеті құрылғаннан басталды, онда пенджабдықтар басты рөл атқарды. Белудждар өз мемлекеттігін алған жоқ. Аймақта әрекет ететін сепаратистік топтар Белуджистанның тәуелсіздігі үшін күресуде.

Белуджистан азат ету армиясы диверсиялық әдістерді қолданатын әскерилендірілген топ. Ол Пәкістанда, АҚШ-та, Ұлыбританияда, Еуропалық Одақ пен Қытайда террористік ұйым ретінде танылған.