Пәкістан Газаға 100 тонна азық-түлік жөнелтті
Пәкістан Газа секторына 100 тонна гуманитарлық жүк жіберді. Бұл қадам БҰҰ қолдайтын бақылау ұйымы Газадағы аштықты ресми растағаннан кейін қабылданғанын Анадолы агенттігі хабарлады.
Алматы, NEGE. Пәкістанның Төтенше жағдайларды басқару ұлттық агенттігінің (NDMA) мәліметінше, премьер-министр Шахбаз Шарифтің тапсырмасымен ұн, дайын тағамдар, май, тосап пен жемістер тиелген көмек Лахордан жөнелтілді.
Бұл – Пәкістаннан Газаға жолданған 19-шы көмек партиясы. Осы уақытқа дейін жеткізілген гуманитарлық көмектің жалпы көлемі 1915 тоннаға жеткен.
Қазіргі таңда Газа секторы Израильдің шабуылдары мен қатаң қоршауы салдарынан ауыр гуманитарлық дағдарысты бастан кешіруде. Азық-түлік, су, дәрі-дәрмек пен медициналық жабдықтар жетіспей жатыр. Әсіресе балалар арасында аштықтан көз жұму деректері көбейген.
Бақылау ұйымының 15 тамызда жариялаған есебінде Газа аймағындағы аштық деңгейі ең жоғарғы – 5-ші «катастрофалық» деңгейге жеткені айтылды. Құжатта «22 айға созылған қақтығыстардан кейін жарты миллионнан астам адам аштық пен жоқшылықта өмір сүріп жатыр» делінген.
