«Өзекті мәселелерді талқылады»: Тоқаев пен Путин телефон арқылы сөйлесті
Мемлекет басшысы Қасым-Жомарт Тоқаев Ресей Президенті Владимир Путинмен телефон арқылы сөйлесті.
Астана, NEGE. Ақорданың хабарлауынша, Қасым-Жомарт Тоқаев Владимир Путиннің биыл мамырда Қазақстанға жасаған мемлекеттік сапары кезінде қол жеткізілген уағдаластықтар екіжақты ынтымақтастықтың барлық бағытына айтарлықтай серпін бергенін атап өтті. Президенттің мәлімдеуінше, екі ел үкіметтері аталған келісімдерді дәйекті түрде жүзеге асырып жатыр.
«Мемлекет басшылары халықаралық және өңірлік күн тәртібіндегі өзекті мәселелерді талқылады. Президенттер жұмыс барысында тұрақты байланыста болуға келісті», – делінген ресми ақпаратта.
Сондай-ақ Тоқаев пен Путин шілде айының соңында Омбы қаласында ұйымдастырылатын ХХІІ Қазақстан – Ресей өңіраралық ынтымақтастық форумына дайындық мәселелерін пысықтады.
