Өзбекстанның да бірқатар облысында жарық өшті
Өзбекстанның Сурхандария және басқа да бірқатар облысында электр өшіп қалды.
Астана, NEGE. Елдің энергетика министрлігінің хабарлауынша, көршілес елдің энергетикалық жүйесінде болған апат Орталық Азияның ортақ энергетикалық жүйесіне әсер еткен.
Бұған дейін Қазақстанның энергетика министрлігі Орталық Азияның энергетикалық жүйесі тарапынан электр энергиясы ауысымының күрт өзгеруіне байланысты энергетикалық жүйеде қуат шамадан тыс артып кеткенін мәлімдеген еді. Нәтижесінде апатқа қарсы автоматика іске қосылып, кейбір өңірлердегі тұтынушылар электр қуатынан ажыратылған.
Еске салсақ, бүгін, 14 тамызда Алматы қаласының Бостандық, Наурызбай, Әуезов және Алатау аудандарында және Алматы облысының бірнеше ауданында электр жарығы өшіп қалды.
«Алатау Жарық Компаниясы» АҚ өкілдері сағат 14:38-де "KEGOC" АҚ-ға тиесілі 500 кВ Л-5400, Л-5300 және Л-5320 әуе электр беру желілерінің апаттық сөнуі салдарынан компания желілерінде апатқа қарсы автоматика іске қосылғанын хабарлады.