Өзбекстандағы "Қазақстан жылы" қорытындыланды
Өзбекстанда жыл бойы "Қазақстан жылы" қарсаңында түрлі шаралар өтті.
Алматы, NEGE. Ташкент қаласындағы «Өзбекстан» халықаралық форумдар сарайында өткен гала-концертке ҚР Мәдениет және спорт министрі Ақтоты Райымқұлова мен Өзбекстан Республикасының вице-премьері Азиз Абдухакимов, Өзбекстан Республикасының Мәдениет министрі Бахтиёр Сайфуллаев қатысты.
Концертте Қазақстанның халық әртісі Роза Рымбаева, Қазақстанның еңбек сіңірген қайраткерлері Азамат Жылтыргөзов, Медет Шотабаев, Ардақ Балажанова, Батыржан Мықтыбаев, Әлішер Кәрімов, Құрманғазы атындағы Қазақ Мемлекеттік академиялық халық аспаптар оркестрі, «Салтанат» Мемлекеттік би ансамблі және халықаралық және республикалық конкурстардың лауреаттары өнер көрсетті.
Айта кетерлігі, ҚР Мәдениет және спорт министрлігі Қазақстан Республикасының Өзбекстан Республикасындағы Жылының жабылуы аясында Қазақстан өнер шеберлерінің концерті мен танымал Ә.Қастеев музейінің арнайы көшпелі көрмесін ұйымдастырған болатын.
