Дүние
Өзбекстан: далаға шығуға рұқсат берді
Өзбекстан билігі карантин шарттарын жеңілдете бастады. Тұрғындар жекеменшік автокөліктерін пайдалана алады, үйге жақын маңда балалармен серуендеуге рұқсат етіледі. Бұл туралы ел президенті Шавкат Мирзияев мәлімдеді.
Алматы, NEGE. Автокөлікті таңертең сағат 7:00-10:00 аралығында, ал кешке сағат 17:00-20:00 аралығында жұмысқа, дәріханаға немесе дүкенге барып қайту үшін пайдалануға болады. Арнайы рұқсаты барларға автокөлікпен жүруге шектеу жоқ.
Сонымен бірге Өзбекстан президенті облысаралық және қалааралық жүк қатынасына рұқсат берді. Шаруалар өсірген жеміс-жидекті, астықты және басқа да ауыл шаруашылығы өнімдерін сауда орындарына, жәрмеңкелерге және базарларға жеткізуге рұқсат.
"Санитарлық-эпидемиологиялық жағдайдың жақсаруы мен күннің жылуын ескеріп, ата-аналарға балалармен серуендеуге рұқсат етілді", - деп мәлімдеді Мирзияев. Бірақ олар үй маңынан қатты алыстамауы керек.
Ресми мәлімет бойынша, Өзбекстанда 2002 адам коронавирус жұқтырған. 1066 адам жазылған, сегіз адам қайтыс болған.