Өзбекстан Футболдан әлем чемпионатына орай коллекциялық монеталар шығарады
Өзбекстан Орталық банкі ұлттық құраманың футболдан алғаш рет әлем чемпионатына қатысу құрметіне орай таза алтын мен күмістен естелік монеталар шығарады.
Астана, NEGE. 999,9 сынамалы таза алтын мен күмістен соғылатын монеталардың аверсінде футболдан Өзбекстан құрамасының логотипі, классикалық футбол добы және «Тарихи жеңіс. Өзбекстан футболы 2026 жылғы әлем чемпионатында» деген жазу бейнеленген.
Монеталардың дизайнында жанкүйерлер арасында «Ақ қасқырлар» деген атаумен танымал ұлттық құраманың символы да көрініс тапқан. Реверстегі қасқыр құрамадағы 26 ойыншының сұлбасынан құралған.
Салмағы 31,1 грамм болатын монеталардың тиражы шектеулі болады: 100 алтын және 1000 күміс дана.
18 маусымнан бастап естелік монеталар коммерциялық банктердің 690 филиалында сатылымға шығарылады.
