Өткен жылы Мәдениет саласында қандай жетістіктер орын алды?

Алматы, NEGE. Ел мақтанышы Димаш Құдайберген Мажарстанның аренасында әлемнің 77 елінен келген тыңдармандарын жинап ауқымды концерт өткізді. Сондай-ақ, Будапештте әлем мойындаған опера әншісі Пласидо Домингомен бірге өнер көрсетті.Халықаралық атаққа ие актер Джеки Чанның «Аңыз» атты фильмінің саундтрегін орындады.

Отандық әнші Фаррух Тохтамұратовтың «Жүрек» әні әлемнің ең танымал музыкалық қосымшасы Shazam-да 5 миллиард тыңдалым жинап, әлемдік рейтингте 13-ші орынға ие болды. Бұл әннің жетістігі қазақ музыкасының халықаралық аренада мойындалғанын дәлелдейді.

Қазақстанның кинематографиялық өнерінде де үлкен жетістіктер болды. Асхат Кучинчирековтің «Бауырына салу» фильмі Францияда арнайы жүлдеге ие болып, «Тұлпар» ұлттық кино сыйлығында «Үздік фильм» атанды. Бұл фильм қазақтың бауырына салу дәстүрі негізінде әжесі тәрбиелеп өсірген баланың өмірін суреттейді.

Әділхан Ержановтың «Дала қасқыры» фильмі Бельгиядағы халықаралық кинофестивальда бас жүлдеге ие болды.

Жылдың тағы бір маңызды оқиғасы – V Дүниежүзілік көшпенділер ойындарының өткізілуі болды. Бұл шараға 90-ға жуық елден 2500-ге жуық спортшы қатысты, 97 медаль сарапқа салынды. Әлемнің назарын аудара отырып, Қазақстан көшпенділер мәдениетін танытуда ерекше рөл атқарды.

Сондай-ақ, Қазақстан алғаш рет Франкфурт кітап жәрмеңкесіне қатысып, кітап индустриясы саласындағы ең ірі тарихи шаралардың бірі – 500 жылдан астам тарихы бар бұл жәрмеңкеге әлемге танымал жазушылармен, әдебиетшілермен тәжірибе алмасты.