Дүние
Отбасылық жанжалдан соң ер адам 11 адамды жайпап тастады
Черногорияның оңтүстігіндегі Цетин қаласы маңындағы Медовина ауылында ер адам көшедегі адамдарға оқ жаудырып, салдарынан бірнеше адам қайтыс болды, оның ішінде балалар да бар, деп хабарлайды Zakon.kz.
Алматы, NEGE. 34 жастағы Вук Бориловичтің оғына оның тоғыз туысы мен сол маңнан өтіп бара жатқан кездейсоқ екі адам іліккен, деп хабарлайды Черногорияның полициясы.
Полиция өкілі Борилович алдымен өз үйін жалдап тұрып жатқан туыстарын атып тастағанын айтты.
«Ол аңшы мылтығымен 8 және 11 жастағы екі баланы атып өлтірген, марқұмдардың анасы да оққа ұшып, ауруханада көз жұмды. Содан кейін ол көшеге шығып, мылтығымен ауыл тұрғындарына атқан: тағы жеті адам қаза тауып, алтауы жарақаттанды», - дейді Черногория полиция басқармасының директоры Зоран Брджанин.
Тоғыз адам оқиға орнында, тағы екеуі ауруханада жан тапсырды.
Мылтық ұстаған ер адам оққа ұшқандарға жедел жәрдем қызметкерлерін жолатпай қойған. Қанды оқиғаға отбасылық жанжал себеп.
Жан-жағын жайпаған ер адамның көзі жойылған. Бір дерек бойынша, оны атқан полицейлер делінсе, тағы бірінде көршілердің бірі екені айтылады. Черногорияда үш күндік аза тұту күні жарияланады.