Отандық прокатта көш бастаған фильм
Апта соңында отандық киносүйер қауым таласа тамашалған фильмдер тізімі анықталды.
Үздік картиналар арасында кассалық табысымен топ жарған - «Харли Квин» лентасы.
«Ticketon.kz» сайтының мәліметінше, «Харли Квин» 65 миллион теңге табыс тапқан.
Марго Робби басты рөлді сомдаған картина бұзық қыздар жасағының хикаялары туралы баяндайды. Фильм сюжеті Харли Квиннің ғашығы Джокермен қарым-қатынасын үзген сәттен басталады. Сүйіктісінен айрылған бикеш Готэм қалашығының қылмыскерлерін жазалауға аттанады.
Голливудтық актерларды фильміне түсірген Нұрлан Қоянбаев апта соңында екінші сатыға төмен түсті. Продюсердің «My love is Aisulu» романтикалық комедиясы 58 миллион теңгеден астам кіріс көрді. Еске салсақ, фильмдегі басты рөл Әсел Сағатоваға бұйырған еді. Үлкен экранға қайта оралған актриса Қоянбаевтың ғашығын сомдайды.
Ал араға 17 жыл салып көрерменімен қайта қауышқан «Bad Boys» үздік үштікті түйіндейді. Фильм апта қортындысы бойынша 29 миллион теңге пайда тапты.