Өскеменде ПТР-тестін сатқан азамат 2 жылға сотталмақ
Өскеменде коронавирусқа қарсы ПТР тест қорытындысын қолдан жасап сатпақ болған 34 жастағы тұрғын интернетке таратқан хабарландыру арқылы анықталып, ұсталды.
Алматы, NEGE. Оқиғаның мән-жайын ішкі істер министрлігінің баспасөз өкілі Шұғыла Тұрлыбектің ведомствоның ақпарат алаңында өткен онлайн брифингіде айтып берді.
"Өскеменде полицейлер коронавирус жұқтырмағаны туралы ПТР тест анықтамасын ешқандай зертханалық талдаусыз-ақ рәсімдеп беретінін жарнамалап, хабарлама таратқан 34 жастағы жігітті ұстады. Бұл қызметі үшін ол 15 мың теңге сұраған. Қазір алаяқтық фактісі бойынша Қылмыстық кодекстің 190-бабымен сотқа дейінгі тергеу жүріп жатыр. Бұл бап бойынша екі жылға дейін бас бостандығынан айыру жазасы қарастырылған", – дейді министрліктің баспасөз өкілі.
Шұғыла Тұрлыбек келтірген деректерге сүйенсек, бұл – Шығыс Қазақстанда тіркеліп отырған алғашқы жайт емес. Бұған дейін Семейде 15 мың теңгеге вакцина паспортын сатқан медицина мамандары ұсталғанын хабарлаған болатынбыз.