Өскеменде қызмет бабында қаза тапқан полицейлерге арналған мурал ашылды
ШҚО-да полиция қызметінде ерлікпен қаза тапқан қызметкерлерді еске алуға арналған мурал ашылды.
Алматы, NEGE. Арт-объект «Ер есімі – ел есінде» деген жазумен бейнеленген, деп хабарлайды polisia.kz.
Өскемендегі көпқабатты үйлердің бірінің қабырғасын енді ерекше сурет безендіріп тұр. Бұл – қызмет бабында қаза тапқан 29 шығысқазақстандық полицейге арналған мурал. Арт-объект департаменттің бастамасымен және қала әкімдігінің қолдауымен жасалды.
Композицияның орталық бейнесі – полиция қызметкерінің силуэті. Оның жанында «Ер есімі – ел есінде» деген жазу орналасқан.
«Бұл арт-объект біздің қызметкерлер үшін жай ғана естелік емес, ол – міндет. Біз халық сенімін нығайтып, тәртіп пен қауіпсіздікті қамтамасыз етуіміз керек. Президент атап өткендей, заңды қатаң сақтау – өркендеген қоғам құрудың басты шарты», – деді ШҚО полиция департаментінің бастығы Ерлан Омарбеков.
Ашылу рәсіміне қаза болған қызметкерлердің туыстары да қатысты. Олар полиция департаментінің жылдар бойы қолдауды үзбей келе жатқанын атап өтті.
«Полицейлердің есімдері мен ерлігі ішкі істер органдары тарихына алтын әріппен жазылған. Олар – жас қызметкерлер үшін батылдық пен адалдықтың үлгісі», – деді ІІМ өкілдері.
