Өскемен қаласының ежелгі атауы белгілі болды
Өскемен мың жылдық тарихы бар шаһар атануы мүмкін. Өйткені қаланың көнеде Кеңгір-тұра деп аталғаны туралы дерек табылы, деп хабарлайды Хабар-24.
Алматы, NEGE. Гарвард Университетінің ғылыми қызметкері, отандасымыз Нұрлан Кенжеахмет осындай жаңалық айтты. Тарихи мәлімет тұрғындарды селт еткізгені рас.
Бір ақиқаты Шығыс Қазақстан облысы археологиялық қазбаларға ең бай өлке. Аймақта тарихтан сыр шертетін жәдігерлер мен деректер табылуы хақ. Өскеменнің өткені туралы тың дерек мұхиттың ар жағынан жетті. Қаланың көне атауы Кеңгір-тұра болуы әбден ықтимал. АҚШ-тағы қазақ ғалымы осындай пікірде.
Жалпы зерттеушінің бұл ойды ұстанып келе жатқанына 10 жылдан асыпты. Енді ол Гарвард университетінің кітапханасынан сөзіне сенім беретін құнды мәліметтер тапқан. Кеңгіртұра туралы жазбалар диссертация беттерінен шыққан.
Мәнжүр патшасынан қалған 1760 жылғы картада да Кеңгір Тұра атауы тайға таңба басқандай тұр. Өскеменнің үстінен Кеңгір өзені өткендігі туралы да материалдар бар дейді ғалым. Жергілікті ғалымдар да Өскеменнің өзі талай тарихи сырды басып жатқанын растайды. Археолог Галина Петенева Ақбауыр археологиялық кешенін зерттеумен айналысады. 40 жылдан астам осы салада қызмет етіп келе жатқан ол Өскеменнің маңы Ертістің бойы жәдігерлерге тұнып тұр дейді.