Елімізде орыс тіліне мемлекеттік тіл мәртебесі берілейін деп жатыр ма?

Сауалнама docs.google.com сайтында жарияланған. Онда «Сізді «Бір ел – бір тіл» жобасы аясында «Мен және Менің елімнің мемлекеттік тілі» сауалнамаға қатысуға шақырған. Қай тілде сөйлейтініңіз, қай тілде оқитыныңыз, тілдік ортаңыз туралы егжей-тегжейлі сұрастырылған.  

«Маңызды мәселе екен. Анкетаны толтырып қазақша деп жаза беріңіздер. Тілімізден айырылғанымыз – елімізден айырылғанымыз», – деп жазады бір мұғалім ата-аналарына жолдаған аудио жазбада.

Енді бір жазбада мекемелерге арнайы комиссия келіп, қай тіл басым екенін тексеріп жатқанын хабарлайды.

«Орыс ағайындар қол жинап: «Бізде бүкіл құжат орысша жүреді. Олай болса, орыс тілін мемлекеттік тіл жасайық» деп жоғары жаққа ұсыныс жасаған. Жоғарыда отырғандар шынымен солай болса, орыс тілін мемлекеттік тіл ретінде қабылдайын деп жатыр. Мемлекет басшыларынан бәрі шығады. Қарағанды жақта қазақтардың өздері орысша болсын деп қол қояды», – делінген екінші бір жазбада.

Кейбір деректер бойынша, көп қазақтардың өзі орыс тіліне дауыс берген. Таңға дейінгі сауалнама қорытындысы бойынша, орыс тілін қолдағандар 80 пайызға  дейін жеткен. Бұдан кейін аталған сайтқа кіріп, қазақ тіліне дауыс беруге шақырған ұрандар қаптап кетті. Елдің бәрі жапа-тармағай дауыс беріп жатқаны байқалады.

Бұл ақпарат енді фейсбук қолданушыларына арасында да дүрбелең тудырып жатыр. Әлеуметтік желіде де осы ақпарат өзекті тақырыпқа айналып кетті.  Өзі дауыс бергенін айтып, дауыс беруге шақырғандар күрт көбейді.   

Десе де, орыс тіліне мемлекеттік тіл мәртебесі беріледі екен деген ақпарат әлі ресми түрде жария етілген жоқ. Осы уақытқа дейін жоққа шығарған да ешкім болмады.