Orda.kz-тің бұрынғы бас редакторы Гүлнар Бажкеноваға шыққан үкім өзгеріссіз қалды
22 қыркүйекте Алматы қалалық соты жазасын екі жылға кейінге қалдыра отырып, 8 жылға бас бостандығынан айыру жазасы кесілген Гүлнар Бажкенованың апелляциялық шағымын қарады.
Астана, NEGE. Бұл жөнінде журналист Вадим Борейко Facebook желісіндегі парақшасында хабарлады.
«Судья Светлана Яковлева төрағалық еткен сот алқасы бірінші сатыдағы соттың шешімін өзгеріссіз қалдырды», – деп жазды журналист.
Еске салсақ, бұған дейін Бостандық аудандық қылмыстық істер жөніндегі соты Бажкенованы Қылмыстық кодекстің 189, 214 және 274-баптары бойынша кінәлі деп танып, оған 8 жылға бас бостандығынан айыру жазасын тағайындаған еді. Бұл ретте жазаны өтеу мерзімі екі жылға кейінге қалдырылған болатын.
ORDA басылымының бұрынғы бас редакторы көрінеу жалған ақпарат таратты, заңсыз кәсіпкерлікпен айналысты, сондай-ақ бөтеннің мүлкін иемденді немесе ысырап етті деп айыпталды.
Іс бойынша 11 адам мен ұйым жәбірленуші деп танылды. Қылмыстық кодекстің 274-бабы бойынша тағылған айып ORDA-да жарияланған сегіз материалға қатысты болды. Олардың арасында «ҚТЖ», «ҚазМұнайГаз», Қарағандыдағы Ленин атындағы кинотеатр, сондай-ақ басқа да компаниялар мен азаматтар туралы материалдар бар.