Оралда тергеу изоляторында қамауда болған ер адам көз жұмды
Орал қаласында тергеу изоляторына тоғытылған ер адам көз жұмды. Марқұмның жасы 63-те, деп хабарлайды Zakon.kz.
Ер адам ҚР ҚК-нің 99-бабы, "Кісі өлтіру" бойынша айыпталып, тергеу изоляторына қамалған, деп жазады "Мой город" порталы БҚО бойынша қылмыстық-атқару жүйесі департаментінің баспасөз қызметіне сілтеме жасап.
"Өлімнің алдын-ала себебі – ми тамырларының атеросклерозы", деп нақтылайды ведомство баспасөз қызметі.
2022 жылдың тамызында Оралдағы тергеу изоляторы қызметкерлері азаптау, ұрып-соғу күдігіне ілінген болатын. Оларға ҚР ҚК-нің 146-бабы, "Азаптау" бойынша айып тағылған еді.
Айта кетсек, 2023 жылы 1 желтоқсанда Шымкентте тергеу изоляторында қамауда болған 29 жастағы күдікті қайтыс болды. Ер адам ауруханада жансақтау бөлімінде көз жұмған. Бұдан кейін марқұм жігіттің анасы желіде видео жариялады.
