Оралда жалған нөмір таққан жүргізуші полицейлерден қашпақ болды
Оралда Әбілқайыр хан даңғылында патрульдік полицейлер «Mercedes Benz» көлігін тоқтатып, тексеру кезінде жүргізушінің жалған мемлекеттік нөмірмен жүргенін анықтады.
Алматы, NEGE. БҚО полиция департаментінің баспасөз қызметінен мәлім еткеніндей, әкімшілік хаттама жасалып болғаннан кейін жүргізуші полициядан жасырынуға тырысты.
Оны ұстау үшін қосымша жасақтар мен автопатрульдер тартылды. Тәртіп бұзушы қызметкерлердің тоқтау талаптарын елемей, жолдарда қауіпті жағдай туғызды. Бағдаршамның тыйым салу белгісінен өтіп, жол қозғалысының басқа қатысушыларына қауіп төндірді.
— Полиция қызметкерлерінің үйлесімді жұмысының нәтижесінде көлік Ә.Молдағұлова көшесінде тоқтатылды. Жүргізушіге қатысты жол қозғалысы ережелерін өрескел бұзғаны үшін бірден бірнеше әкімшілік хаттама толтырылды. Құқық бұзушының көлігі арнайы автотұраққа жеткізілді. Жалған мемлекеттік нөмірлерді қолдануға тыйым салынғандығын және жол қозғалысы ережелерін қатаң сақтау керек екендігін ұмытпау қажет. Полиция мұндай әрекеттер әкімшілік қана емес, кейбір жағдайда қылмыстық жауапкершілікке әкеп соқтыратынын еске салады, — деп хабарлады ведомстводан.
