Оралда іздеуде жүрген ер адам түнгі клубта ЖИ арқылы ұсталды
Оралда жасанды интеллект алаяқтық дерегі бойынша күдікке ілініп, іздеуде жүрген ер адамды анықтауға көмектесті.
Астана, NEGE. Бұл жөнінде Ішкі істер министрлігі хабарлады.
«Қаланың түнгі клубтарының бірінде орнатылған бейнебақылау камерасы келушіні тіркеді. Тұлғаны тану функциясымен жабдықталған бейнеаналитика жүйесі бейнені автоматты түрде іздеуде жүрген адамдардың дерекқорымен салыстырып, сәйкестікті анықтады», – делінген хабарламада.
Сәйкестік туралы сигнал нақты уақыт режимінде жедел басқару орталығына түскен. Араға санаулы минуттар салып, патрульдік полиция қызметкерлері ер адамның орналасқан жерін анықтап, оны ұстап, полиция бөліміне жеткізген.
ІІМ мәліметінше, ұсталған ер адам бұрын Ақтөбе облысы аумағында жасалған алаяқтық дерегі бойынша күдікке ілінген.