Оңтүстікте өзін ҚМА қызметкері ретінде таныстырғандар емхана басшысынан 15 млн теңге талап еткен
Түркістан облысында медициналық мекеме басшысынан ақша бопсаламақ болған екі адам сотқа тартылды.
Астана, NEGE. Қаржылық мониторинг агенттігінің хабарлауынша, МӘМС саласында қаражат жымқыру деректері ашылып жатқан тұста ведомство қызметкерлерінің атын жамылған алаяқтық жағдайлары жиілеп кеткен.
ҚМА мәліметінше, алаяқтар емхана басшыларына өздерін агенттік қызметкерлері ретінде таныстырып, «заңбұзушылық анықталғанын» алға тартып, қылмыстық жауапкершілікпен қорқытып, ақша талап ететін болған.
Осындай алаяқтық схемасы Түркістан облысында анықталған. Мұнда екі адам агенттік қызметкерінің атын жамылып, медициналық ұйымдардың бірінің басшысынан 15 млн теңге көлемінде ақша алмақ болған. Олар алдымен 5 млн теңге алған, кейін тағы 10 млн теңге беруді талап еткен.
ҚМА өкілдерінің хабарлауынша, олар 8 тамызда қылмыс үстінде ұсталды. Сот сыбайластарға қатысты қамауда ұстау түріндегі бұлтартпау шарасына санкция берді.
Қазіргі уақытта күдіктілерге қатысты тергеу амалдары жүргізіліп жатыр.