Оңтүстік Кореядағы ұшақ апаты: 181 адамның 179-ы мерт болды
Алдын ала мәліметтер бойынша, екі адамды ғана аман алып қалу мүмкін болған. Олардың біреуі – жолаушы, екіншісі – экипаж мүшесі.
Алматы, NEGE. Жексенбі күні таңертең Jeju Air әуекомпаниясының ұшағы Муан халықаралық әуежайына шұғыл қонуға әрекеттенген кезде ұшу-қону жолағынан шығып кетіп, қоршауға соғылған. Апат салдарынан ұшақта өрт шығып, артынан жарылыс болды.
Өрт сөндіру қызметі өкілінің айтуынша, соқтығыстан кейін жолаушылар ұшақтан ұшып кеткен. Бортта 181 адам болған, оның алтауы – экипаж мүшелері. Жолаушылардың басым бөлігі Оңтүстік Корея азаматтары, екі адам – Таиланд азаматы.
Бір жолаушы мен бір экипаж мүшесі – апаттан кейін дереу құтқарылып, Мокпо қаласындағы ауруханаға жеткізілді. Алайда, қалған 179 адамның барлығы қаза тапты.
Қазіргі уақытта апаттың нақты себебін анықтау үшін тергеу және құтқару жұмыстары жүргізілуде.