Өнеркәсіптің өңдеу секторындағы өсімі төрт айда 9,9%-ды құрады

Астана, NEGE. Бірінші тоқсанның қорытындысымен салыстырғанда экономикалық өсім серпіні айтарлықтай жақсарды (2026 жылғы қаңтар-наурызда ЖІӨ өсуі 3%), деп хабарлайды Үкіметтің баспасөз қызметі.

Төрт айдың қорытындысы бойынша өнеркәсіптік өндіріс оң өсім көрсетті. Нақты көлем индексі – 102,1%.

Өнеркәсіпті қалпына келтірудің негізгі факторы өңдеу секторының жеделдеуі болды, онда өндіріс 9,9%-ға өсті.

Машина жасаудағы жоғары өсу қарқыны (өсу 23,3%) көлік құралдарын, ауыл шаруашылығы және теміржол техникасын, электр тауары мен жабдығын шығару көлемін ұлғайту есебінен сақталады.

Сондай-ақ жоғары өсім көрсеткендер:

• жеңіл өнеркәсіп – 2,3 есе,

• жиһаз өндірісі – +41,7%,

• фармацевтика – +35,2%,

• құрылыс материалдары – +27,7%,

• химия өнеркәсібі – +18,4%,

• азық-түлік өнімдері – +14,4%.

Тұтастай алғанда, жылдың алғашқы төрт айындағы экономиканың оң серпіні негізгі секторлардағы орнықты өсумен қамтамасыз етілді. Ең жоғары өсім қарқыны мына салаларда тіркелді:

• құрылыс – 114,5%,

• көлік және қоймалау – 112%,

• өңдеу – 109,9%,

• сауда – 105,1%,

• ауыл шаруашылығы – 103,6%.

Осылайша, ЖІӨ-нің нақты өсімінің қазіргі құрылымы шикізаттық емес сектордың, атап айтқанда құрылыс, көлік, сауда және өңдеу өнеркәсібінің рөлін күшейтумен сипатталады.