Танымал актерді жанкүйерлер неге қолдап отыр?
Джонни Деппты қорғаймыз деген желі қолданушылары актердың экс-сүйіктісі Эмбер Хердке қарсы шықты.
Көптің ызасының туындауына қос ғашықтың ғаламторда тараған аудиожазбасы себеп болды. Онда Эмбер ханым актерға ауыр зат лақтырғаны естіледі. Актриса сол сәтте жарына қол көтеріп, ашуға бой алдырған. Ал Депп сүйіктісімен татуласуға тырысқан.
Айта кетейік, жұлдызды жұп 2015 жылы отау құрған еді. Алайда, араға көп уақыт салмай Эмбер сүйіктімнен таяқ жедім деген арызбен ажырасуға өтініш берген болатын. Зорлық-зомбылық әрекетінің құрбаны атандым деген Хердтың бұл мәлімдемесінен кейін, Депптың өнердегі мансабы өрге баспады. Бірнеше кинотуындыда төбе көрсетуіне кедергі келтірмей қоймады. Тіпті, актер «Pirates of the Caribbean / Кариб теңізінің қарақшылары» картинасынан шеттетілді.
Әлеуметтік желі арқылы таралған аудиожазбадан соң Джонни Депттың ақ екендігіне көзі жеткен көпшілік Эмбер Хердтың жазаға тартылуын сұрап отыр. «Өтіріктің арты бір тұтам» деген жанкүйерлер, актрисаны «Аквамен» картинасынан алып тастауды өтінуде. Сондай-ақ, желіде Кариб Қарақшысын қолдау мақсатында #JusticeForJohnnyDeep хештегі іске қосылды.
