«Ол сотта да жеңіп, ақталып шығамын» – Айыпталушылардың бірі Шерзаттың өлімінен кейін басқа іс бойынша 7 жылға сотталған
Бүгін Жетісу облысының қылмыстық істер жөніндегі мамандандырылған ауданаралық сотының ғимаратында Шерзат Полаттың өліміне айыптау жөніндегі іс бойынша кезекті сот отырысы өтіп жатыр.
Алматы, NEGE. Бүгінгі сот отырысында айыпталушы Азамат Тоқтаубаевтан жауап алынып жатыр.
Мемлекеттік айыптаушы Дана Сәрсенбай сотталушы Азамат Тоқтаубайдың Дархан Әскентайға қатысты берген бірінші айғағына байланысты бірнеше сұрақ қойды. Ол өз жауабында Дархан Әскентайға қатысты жалған айғақ бергенін мәлімдеді.
Айыпталушы прокурордың сұрақтарына жауап беру барысында Шерзат Полаттың қазасынан кейін екі апта өткен соң басқа іс бойынша сотталғанын растады. Оқиға болған кезде сотталушы Азамат Тоқтаубаев үйқамақта болған.
Белгілі болғандай, өткен жылдың қазан айында ол қасақана ауыр дене жарақатын келтіргені үшін 7 жылға бас бостандығынан айырылған. Азаматтың айтуынша, мұндай қатаң жазаға Шерзаттың резонанстық ісі себеп болған. Яғни, дәлелдер болмаған, ал ол өзінің қылмысқа қатысы жоқ екенін мәлімдеді.
«Қазір мен Жоғарғы Сотқа шағым түсірдім. Ол сотта да жеңіп, ақталып шығамын», – дейді Токтаубаев сенімді түрде.
Шерзат Полаттың қылмыстық ісі бойынша Азамат Тоқтаубаев «Бұзақылық» (293-бап 3-бөлігі) бабымен айыпталып жатыр.