«Ол кісілерден қорқамын...» – «Баталовтан бала таптым» деген келіншектің жанайқайы

Қарлығаш (өз өтінішімен есімі өзгертілді – ред.) бұған дейін отандық телеарналардың біріндегі ток-шоуға шықпақ болған екен, алайда әлдебір құдіретті күш телеарнаға қысым жасап, түсірілімді тоқтатып тастапты.

«Әріптестеріңіздің бірі маған «Nege.kz порталына хабарласыңыз, сізге солар көмектесуі мүмкін» деп кеңес айтты. Сол себепті сіздерге хабарласып отырмын, менің жанайқайымды жерге тастамауларыңызды өтінемін», – деді Қарлығаш.

Тілшіміз дереу Талдықорған қаласына барып, «Баталовтан бала таптым» деген келіншек пен оның адвокатының уәжін тыңдап келді.

«Қол-аяғыңды сындырып, қаланың сыртына апарып көміп кетеміз» деді...

– Амандық Ғаббасұлымен 2011 жылы таныстық. Ол кезде облыс әкімінің бірінші орынбасары еді. Мені көріп, біреу арқылы телефон нөмірімді алдырып, қайта-қайта телефон соқты. Мен ол кезде ажырасқан едім, екі кішкентай баламен қалғам. Жұмыссызбын. Балаларым кішкентай еді. Сол кезде «танысайық, кездесейік» деп ол кісі кездесуге шақырды. Келістім. Жүргізушісі келіп, мені алып кетті. «Казахстанская» көшесінде үйі болған, сол пәтеріне бардық. Сөйлестік, жақын таныстық. Ол кісі маған өте жақсы адам боп көрінді. Менің өмірбаянымды сұрады. Әке-шешем жоқ екенін, екі баламен күйеуім тастап кеткенін, біреудің үйін жинап, дәретханасын тазалап күнелтетінімді, тек тамаққа ғана ақша табатынымды, пәтер ақысын төлей алмай жүрегімді айттып, жыладым. Ол кісі маған «сен уайымдама, мен саған көмектесемін» деді.

Кейін Амандық Ғаббасұлымен жақын қарым-қатынаста болдық. Ол кісіден қызыма аяғым ауыр боп қалды. Шынымды айтсам, ол кісіге айтпай, баланы алдырып тастасам ба деген ой болды. Өйткені ол – үлкен кісі, ал мен жаспын. Аяғым ауыр екенін айтсам қалай болады, туған-туыс, ел-жұрт не дейді деп қорықтым. Сөйтіп алты жарым айға дейін жүріп қалдым. Кейін баланы алдыруға барғанымда ол жердегілердің «баланы кесіп-кесіп сойып аламыз» дегенін естіп, жылап шығып кеттім.

Сол кездерде пәтер ақысын төлеуім керек болды да, телефонымды сатып, екі-үш ай телефонсыз жүріп қалдым. Кейін қызымды аман-есен босанып, жөргекақысына телефон сатып алдым. Сол кезде Амандық Ғаббасұлы «сенің нөміріңді әзер таптым» деп телефон соқты. Ол кісіге «сізге сюрпризім бар» деп едім, үндемей қалды, бірден түсінді. «Қыз тудым» дедім. «Мен қазір Алматыдамын, жақын арада келемін, кездесейік» деді ол кісі. «Жақсы» дедім. Бірақ содан кейін маған мүлдем хабарласпады.

Қызым бес-алты айлық болған кезде ол кісіге суреттерін жіберетінмін. Ештеңе айтпаймын, тек суреттер ғана жіберем. Ол кісі көреді, бірақ жауап бермейді. Кейін ол кісіге жазып, «қызыма тегіңізді беріңіз, қайта-қайта көмек сұрата бермеңіз» дедім. Сол кезден бастап түрлі қоқан-лоққы басталды.

2018 жылы біреулер телефон соғып: «Сіз мені тыңдаңыз, бұдан былай біздің көкемізге хабарласатын болсаңыз, балаңыздың аяқ-қолын сындырып, өртеп кетеміз», – деді. Балам есіктің алдында ойнап жүрген, қатты қорықтым. Жүгіріп балконға шығып, айқайлап баламды шақыра бастадым. Сол кезде жаңағы адам екінші рет телефон соқты да, күліп тұрып: «Не, қорқып кеттің бе? Бұл саған алғашқы және соңғы ескерту! Енді көкемізді мазалайтын болсаң, сенің да қол-аяғыңды сындырып, қаланың сыртына апарып көміп кетеміз, сені ешкім таба алмай қалады. Ұқтың ба?! – деді өктем дауыспен. Баламды алып кете ме деп «ұқтым» дедім. «Ұқтың ба?! Ұқтың ба?!» деп төрт-бес рет сұрады. «Ұқтым, ұқтым» дей бердім...

NEGE: Бұл – кейіпкеріміздің сөзі. Өз жанымыздан ештеңе алып-қоспадық. Оның айтқан уәжінің толық нұсқасын және адвокат Гүлшат Азаматованың түрлі сатыдағы сот шешімдеріне сүйене отырып келтірген дәлел-дәйектерінің жазбасын YouTube арнамыздан көруге болады. Егер қарсы тараптың да айтары болса, NEGE-нің мінберін дәл осы форматта ұсынуға дайынбыз.

Айтпақшы, кейіпкеріміздің кейіннен қайыра соғып: «Мен Nege.kz-ке хабарластым ғой, енді сұхбатым шыққаннан кейін маған, менің қызыма, балаларыма немесе жақындарыма бір жағдай болып жатса, онда оған Баталов Амандық Ғаббасұлы жауапты болады. Осы жазбаны да сақтап қойыңыздаршы», – деп қиыла сұраған өтінішін де жауапсыз қалдыра алмадық...