Нұрсұлтан Назарбаевтың баспасөз хатшысы мәлімдеме жасады
Қазақстан Республикасы Тұңғыш Президентінің баспасөз хатшысы Айдос Үкібай Нұрсұлтан Назарбаевтың ауруына қатысты түсініктеме берді.
Алматы, NEGE. Баспасөз хатшысы Назарбаевтың жұмыс кестесі ай басынан бері тығыз болғанын атап өтті.
"Елбасы бірқатар екіжақты келіссөздер өткізді, ресми тұлғаларды қабылдады. Сонымен қатар, Тұңғыш Президент отандық және шетелдік БАҚ өкілдеріне сұхбат берді. Телевизиялық түсірілімдерді ұйымдастыруға қатысты. Жалпы, Нұрсұлтан Назарбаевтың денсаулығы қатаң бақылауда. Дүрбелең туғызып, алаңдауға негіз жоқ. Елбасы заманауи байланыс арналарын қолдана отырып, қашықтан жұмыс істейді", - деді Үкібай.
Бекітілген хаттамаға сәйкес, Тұңғыш Президенттің басқа адамдармен тікелей байланысы шектелген. Елбасының қатысуымен жоспарланған кейбір іс-шаралар интернеттегі бейнеконференция арқылы өтуі мүмкін.
"Ресми ақпарат жарияланған алғашқы минуттардан бастап алаңдаушылық білдірген азаматтар өте көп. Олар Тұңғыш Президенттің тезірек сауығып кетуіне тілектес. Менің телефоныма да хабарласып жатқандар көп. Журналистер, достарым, туыстарым, әріптестерім, оның ішінде жақын және алыс шетелдегілері де Елбасымызға күш-қайрат және зор денсаулық тілеуде. Мемлекет басшысы Қасым-Жомарт Тоқаев та Тұңғыш Президентке өз қолдауы мен тілегін білдірді. Елбасы кеңсесіне еліміздің барлық аймақтарынан жеделхаттар келіп жатыр. Нұрсұлтан Назарбаев өз денсаулығына алаңдаушылық білдіріп, жылы лебізін жеткізген барлық қазақстандықтарға өз ризашылығын айтады, - деп жазды баспасөз хатшысы.