Нұрсұлтан Назарбаев 85 жасқа толды
Бүгін, 6 шілде күні, Қазақстанның тұңғыш Президенті Нұрсұлтан Назарбаевтың 85 жылдық мерейтойы. Биылғы дата ресми салтанатты шараларсыз өтіп жатыр.
АЛМАТЫ, NEGE. Айта кетейік, 6 шілде – Қазақстанда Астана күні ретінде аталып өтеді. Бұл күн елордамен тығыз байланысты: дәл осы күні туған Назарбаевтың бастамасымен 1997 жылы Қазақстан астанасы Алматыдан Ақмолаға көшіріліп, кейінірек Астана, Нұр-Сұлтан, одан кейін қайтадан Астана атауына ие болды.
Өмір жолы мен саяси қызметі
Нұрсұлтан Назарбаев 1940 жылы 6 шілдеде Алматы облысының Шамалған ауылында дүниеге келген. Саяси аренаға ол Кеңес Одағы кезеңінде келді — 1989 жылы Қазақ КСР Коммунистік партиясының бірінші хатшысы, 1990 жылы Жоғарғы Кеңестің төрағасы болып тағайындалды.
КСРО тарағаннан кейін Назарбаев тәуелсіз Қазақстанның тұңғыш Президенті болып сайланып, елді шамамен 30 жыл басқарды. 2019 жылы 19 наурызда ол президенттік өкілеттігін тоқтатып, билікті Қасым-Жомарт Тоқаевқа тапсырды.
Мұрасы мен қоғамдағы бағасы
Назарбаевтың саяси мұрасы әрқилы бағаланады. Бір жағынан, ол елдегі саяси тұрақтылық пен экономикалық өсімді қамтамасыз етті. Екінші жағынан, оппозицияны шектеу, сөз бостандығын қысу және тұлғалық культ қалыптастыру үшін сынға ұшырады.
2022 жылғы Қаңтар оқиғасынан кейін елде «деелбасизация» процесі басталды — Елбасының тарихи рөлі қайта қаралып, ерекше мәртебесі мен артықшылықтары жойылды.
Айта кетейік, кеше Мемлекет басшысы Қасым-Жомарт Тоқаев тұңғыш Президентті 85 жасқа толуымен құттықтаған болатын.