Нүкенова қайтыс болған күні Путиннің делегациясы БАУ мейрамханасындағы VIP бөлмені брондаған
Астананың мамандандырылған ауданаралық сотында экс-министр Қуандық Бишімбаевтың әйелін өлтіру ісі бойынша сот отырысы жалғасып жатыр.
Алматы, NEGE. Бүгінгі сот отырысында Салтанат Нүкенова қайтыс болған күні сол кезде Астанада жүрген Ресей президенті Владимир Путиннің делегациясының БАУ мейрамханасындағы VIP бөлмені брондағаны белгілі болды.
Істің бұл мән-жайы екінші сотталушы Бақытжан Байжановтың телефонын тексеру кезінде анықталды.
Жәбірленуші тарап Бишімбаев пен Байжановқа Нүкенованың денесінен құтылуына осы себеп кедергі болды деп болжады.
Байжанов мейрамхана әкімшісі Қарлығашқа жазған смс-хатында барлық брондардан бас тартуды сұраған. Өйткені 9 қарашада Бишімбаевтың тапсырмасымен мейрамхана жабылған.
«Бұл жағдайдың іске тікелей қатысы бар. Олар Ресей Федерациясы президентінің делегациясы келетінін біліп, Салтанаттың денесін мейрамханадан шығара алмаған», - деді жәбірленуші тараптың адвокаты Жанна Оразбақова.
Судья бұл жәбірленуші тараптың қорытындылары ғана екенін айтты.
«Бұл сіздің қорытындыңыз. Өз қорытындыңызды сот жарыссөздерінде айтыңыз», - деді судья Айжан Құлбаева.
