Несие алған отбасыларға жәрдемақы берілмеуі мүмкін
Қазақстанның Еңбек және халықты әлеуметтік қорғау министрі Светлана Жақыпова Мәжілісте өткен брифингте несиесі бар отбасыларға атаулы әлеуметтік көмек (АӘК) беру тәртібіне қатысты бастаманы түсіндірді.
Алматы, NEGE. Министрдің айтуынша, кейбір отбасылардың қаржылық жағдайы ресми есепте кедейлік шегінен жоғары көрінуі ықтимал. Себебі жиналған депозит немесе алынған несие сомасы олардың табысына қосылып есептеледі.
«Егер отбасы болашақ баспанасына алғашқы жарна жинап, депозит ашса – бұл құпталады. Ал несие мәселесінде жағдай өзгеше. Қазір бұл мәселе тек кеңес құжаты ретінде қаралып жатыр. Мысалы, үш адамнан тұратын отбасы үш миллион теңге несие алса, бұл әрқайсысына айына 300 мың теңгеден келеді. Мұндай табыс деңгейі кедейлік шегінен әлдеқайда жоғары. Сондықтан олар АӘК алмайды. Мен мұны әділ деп санаймын», – деді министр.