Назарбаев мектебінде терезеден құлаған оқушының жағдайы айтылды
Солтүстік Қазақстан облысының денсаулық сақтау басқармасы үшінші қабаттың терезесінен құлап, жарақат алған баланың қазіргі жағдайынан хабардар етті.
Астана, NEGE. Оқушы шұғыл түрде мамандандырылған орталыққа жеткізілген.
«Науқас 19 ақпанда нейрохирургиялық көмек көрсету және операция жасау үшін қалалық көпбейінді ауруханадан шұғыл түрде көпбейінді орталықтың нейрохирургия бөліміне ауыстырылды», – делінген хабарламада.
Дәрігерлер баланың қазіргі жағдайын тұрақты деп бағалаған, оң динамика байқалады. Сондай-ақ басқарма өкілдері оның қажетті ем-шараны толық көлемде алып, тексеруден өтіп жатқанын атап өтті.
Еске салсақ, 17 ақпан күні Петропавл қаласындағы Назарбаев зияткерлік мектебінің 18 жастағы оқушысы үшінші қабаттың терезесінен құлап, ауыр халде ауруханаға жеткізілген. Полицейлер бұл факт бойынша сотқа дейінгі тергеу басталғанын хабарлады.
