Науқастарға шуға шыдауға тура келеді: Астанада аурухана жанындағы құрылыс жалғасады
Астанада №2 қалалық көпсалалы аурухананың жанындағы құрылыс тоқтатылмайды. Қала әкімдігі тұрғын үй кешенін салуға берілген рұқсат құжаттарының заңды екенін мәлімдеді.
Астана, NEGE. Елорда әкімінің орынбасары Ерсін Өтебаевтың айтуынша, аурухана маңындағы жер телімі жекеменшікке тиесілі. Құрылыс компаниясында жобалық-сметалық құжаттама мен барлық қажетті рұқсат бар.
Журналистер құрылыс жедел жәрдем көліктерінің кіріп-шығуына кедергі келтірмей ме деп сұрады. Өтебаевтың сөзінше, жоба әзірленген кезде жолдарға қатысты мәселелер ескерілген.
«Ол жерде қиылыс бар. Сондықтан қозғалыс толық жабылады деп ойламаймын», – деді Ерсін Өтебаев.
Әкімдік өкілі құрылыс кезінде аурухана пациенттері шу еститінін де жасырмады. Оның айтуынша, бұл уақытша қолайсыздық қана. Әсіресе бастапқы кезеңде, қада қағу жұмыстары жүріп жатқанда шу болуы мүмкін. Кейін бұл жұмыстар аяқталған соң жағдай тұрақталады, деп сендірді.
Сондай-ақ ол құрылыс жұмыстары тек күндіз жүргізілетінін айтты.
Ерсін Өтебаевтың мәліметінше, қазіргі таңда әкімдіктің тұрғын үй кешенінің құрылысына берілген рұқсаттарды кері қайтару жоспары жоқ. Себебі барлық құжат заң талаптарына сай рәсімделген.
Бұған дейін Астанадағы бірнеше тұрғын үй кешенінің тұрғындары №2 қалалық көпсалалы аурухананың маңында «BAYYAN» тұрғын үй кешенінің салынуына қарсы шығып, құрылысты тоқтатуды талап еткен петиция жариялаған.
Өтініш авторларының айтуынша, басты мәселе – болашақ тұрғын үй кешенінің ауруханаға тым жақын жерде салынуы. Олардың сөзінше, бұл жолмен жедел жәрдем көліктері тұрақты қатынайды. Ал жаңа тұрғын үй салынғаннан кейін көбейетін көлік ағыны кептеліс туғызып, дәрігерлердің науқастарды дер кезінде жеткізуіне кедергі келтіруі мүмкін.
