Наталья Богданова Қазақстанға үшінші жеңіс әкелді
Астанада өтіп жатқан бокстан Әлем кубогында Наталья Богданова австралиялық Лекейша Перголитиді 4:1 есебімен жеңіп, Қазақстан құрамасына кезекті жеңіс сыйлады.
АСТАНА, NEGE. Жекпе-жек тартысты және қарқынды өтті. Қарсыластар бір-біріне қарсы шабуылмен жауап қайтарып отырды. Алайда шешуші сәттерде Богданова дәлдік пен суыққандылық танытып, басым түсіп отырды.
Соңғы раундта бапкері Натальяға: «Қашықтықта жұмыс істе!» деп нақты нұсқау берді. Спортшы бұл тапсырманы толық орындап, қарсыласына жақын қашықтықтағы айқасты таңуға мүмкіндік бермеді.
Бұл — Богданованың турнирдегі үшінші жеңісі. Бұған дейін ол Нигерия мен Бразилия боксшыларын сенімді жеңіп, тұрақты дайындық пен дұрыс тактиканы көрсетіп келеді.