Мүсірепов театрының қоржыны тағы бір премьерамен толықты

Аналардың құрметіне арналған театр туындысына Фарғад Модағали режиссерлік жасаған. Ал басты кейіпкерлерді Лидия Кәден, Күлжәмилә Белжанова, Қазбек Төлен, Елдар Отарбаев ойнайды. Оқиға қарт әйел мен оның жұмысбасты болып кеткен ұлының телефонмен сөйлесуі арқылы өрбиді.

Иә, күнделікті күйбең тірлікте жақын адамға телефон шалуды ұмыт қалдыратынымыз бар. Бірақ өткен күндердің қайтып келмесін ескерсек, анаға көрсетпеген мейірбандық үшін бармақ тістеп қаларымыз анық. Бірақ мұны біреу ерте ұғынса, біреу кеш түсініп жатады.

«Бос әңгімеге уақыт жоқ» дейтін ұлдың әр телефон шалған сайын анасының әңгімесіне құлақ түре түсуі өзінің кең дүниеде алдымен кімге керектігін жіті түйсіндіреді.

Жобаны сахналағандар «Біз кейде естімейміз, кейде түсінуге кеш қаламыз. Бірақ ана жүрегі бәрін сезеді. Сондықтан өміріңіздегі ең маңызды қоңырауды жіберіп алмаңыз», – дейді.