Мұнай бағасы күрт көтерілуі мүмкін – Таяу Шығыстағы шиеленіс жаһандық нарықтарға әсер етті
АҚШ-тың Ирандағы ядролық нысандарға жасаған әскери әрекеттері әлемдік нарықтарда үлкен толқулар тудырды. Мұнай қымбаттап, инфляция өршіп, инвесторлар қауіпсіз активтерге көше бастауы мүмкін, деп хабарлайды Reuters.
AЛМАТЫ, NEGE. 2025 жылғы 21 маусымда АҚШ президенті Дональд Трамп Иранның ядролық инфрақұрылымына қарсы әскери операция басталғанын ресми мәлімдеді. Әуе шабуылы нәтижесінде Фордо, Натанз және Исфахан қалаларындағы стратегиялық нысандар бомбалауға ұшырады. Трамп әсіресе Фордо нысанына толық бомбалық жүк тасталғанын атап өтіп, операцияны «тарихи оқиға» деп бағалады.
Осы оқиғадан кейін жаһандық нарықтарда алаңдаушылық күшейді. Potomac River Capital инвестициялық директоры Марк Спиндэл:
«Нарықтар бұл жағдайға алаңдаулы түрде жауап береді. Мұнай бағасы күрт өседі. Қазірдің өзінде АҚШ бұл қақтығысқа тереңірек араласып отыр. Алда не болатыны белгісіз», – деп мәлімдеді.
Brent маркалы мұнайдың бағасы маусым айының басынан бері 18%-ға өсіп, бір баррель үшін 79 АҚШ долларына жетті – бұл соңғы бес айдағы ең жоғары көрсеткіш.
Cresset Capital инвестициялық директоры Джек Аблин бұл жағдайдың экономикаға әсері зор екенін атап өтті:
«Мұндай геосаяси шиеленістер біз үшін қосымша тәуекел деңгейін қалыптастырады. Энергия бағасы мен жалпы инфляцияға ықпал етуі әбден мүмкін».
