Қазақстанда мобильді аударым лимиті 1 млн теңгеге дейін өсуі мүмкін
Қазақстанда банкаралық мобильді аударымдардың бір операциясына белгіленген лимитті 500 мың теңгеден 1 млн теңгеге дейін арттыру ұсынылды.
Астана, NEGE. Бұл туралы Үкіметтегі брифингте Ұлттық банк төрағасының орынбасары Бинұр Жәленов мәлімдеді.
Ұсыныс 19 шілдеде іске қосылған Банкаралық мобильді төлемдер жүйесіне қатысты болып отыр. Жүйе арқылы азаматтар әртүрлі банктер арасында телефон нөмірі бойынша ақша аударып, бірыңғай QR арқылы төлем жасай алады.
«Өзгерістер жобасы жария талқылауға шығарылды. Бір транзакцияның лимитін 500 мыңнан 1 млн теңгеге дейін арттыру ұсынылып отыр. Құжат қабылданса, жаңа ережелер қазан айынан бастап күшіне енуі мүмкін», – деді Бинұр Жәленов.
Бұл ретте 1 млн теңге лимиті бір ғана операцияға қатысты болады. Банктер өздерінің ішкі тәуекелдерді басқару талаптарына сәйкес қосымша шектеулер енгізе алады. Ал пайдаланушылар мобильді қосымша арқылы жеке аударым лимиттерін өздері белгілей алады.