Митингтерде барлығы 55 адам ұсталған
«Кеше шерушілер билік органдарының талаптары мен ескертулеріне құлақ аспағандықтан, Нұр-Сұлтан қаласында 32 адам, Алматы қаласында 23 адам полиция бөлімшелеріне жеткізілді» деп хабарлайды Ішкі істер министрлігінің баспасөз-қызметі.
Алматы, NEGE. ІІМ мәліметінше, ҚР Бас прокуратурасының ескертуіне қарамастан, кей азаматтар арандатушылыққа еріп, заңсыз наразылық акцияларына қатысқан.
Нұр-Сұлтан қаласында ондаған адам Республика алаңы мен Абай көшелерінің қиылысында жиналып, заңсыз митинг өткізген. Ал Алматы қаласында митинг Қазақстанның Тәуелсіздік монументі жанында өтті.
Жергілікті атқару органдарының митинг өткізуге заңдық негізі жоқ деген ескертпесін елеместен, жиылған көпшілік Нұр-Сұлтан мен Алматы қалаларының көшелерімен шеру құрып жүрген. Осындай іс-әрекеттері арқылы олар мереке күні тынығып жатқан азаматтардың тыныштығы мен демалысына нұқсан келтірген деп жазады, ІІМ баспасөз-қызметі.
Олармен профилактикалық әңгіме жүргізіліп жатыр және әкімшілік жауапкершілікке тарту мәселесі де қарастырылуда.
