Мысыр вакцина салдырған туристер үшін ПТР-тестін алып тастады
Мысыр вакцина салдырған туристерден ПТР-тестін талап етпейді. Тек олар коронавирустың жаңа штамдары әсер етпеген елдерден келген болуы керек.
Алматы, NEGE. Бұл туралы РИА Новости Egypt Air әуекомпаниясының баспасөз релизіне сілтеме жасап жазады.
«Коронавирус мутациясы анықталмаған елдерден вакциналау туралы құжатпен келген жолаушылардың вакцинация туралы куәлігі тексеріледі. Қолмен түзетілмеген және құжатты берген органды тексергеннен кейін QR коды бар куәліктер қабылданады», – делінген әуекомпанияның Мысыр Денсаулық сақтау министрлігінің директивасына сілтеме жасаған хабарламасында.
Мысыр Дүниежүзілік денсаулық сақтау ұйымы мен Мысырдың дәрі-дәрмектер басқармасы мақұлдаған вакциналарды, соның ішінде Спутник V, Pfizer, AstraZeneca, Moderna, Sinopharm, Sinovac, Johnson&Johnson препараттарымен екпе салдырған туристерді қабылдайды. Вакцина салдырғаннан кейін 14 күн өту керек.
