«Міржақып. Оян, қазақ» кинотуындысының режиссеріне тұлпар мінгізді
Алматыда белгілі кәсіпкер, меценат Дулат Тастекей «Ұшқан ұя» түлектер қауымдастығының атынан «Міржақып. Оян, қазақ» кинотуындысының режиссері Мұрат Есжанға ат мінгізіп, құрмет көрсетті.
Алматы, NEGE. Марапаттау рәсімі Дулат Тастекей мен Мұрат Есжан оқыған Абай атындағы РММИ шаңырағында өткен болатын. Негізгі іс-шара режиссердің жастармен кездесуіне арналды.
Кездесу барысында режиссер мектепте оқыған жылдары туралы естеліктерімен бөлісіп, оқушыларды қызықтыратын сұрақтарға жауап берді. Ұлағатты ұстаздары жайлы сыр шертіп, ұшқан ұясының болашақ өміріне тигізген әсерімен бөлісті.
«Мұрат Есжан мектебін еш ұмытпай, үнемі көңіл бөліп, әрдайым құрметін аяған емес. Бұл осында отырған кейінгі ұрпаққа үлгі боларлық іс. Сондықтан қазақи салттан айнымай, артымыздан ерген ініге ақ боз ат мінгізу – парызымыз», – деді Дулат Тұрсынұлы.