Министрлік лицензиясынан айырмақ
Қазақстанда бес бірдей жоғары оқу орнының лицензиясы уақытша тоқтатылды. Аталмыш оқу орындарының материалдық базасы көңіл көншітпейді, білікті мұғалімдердің саны талапқа сай емес. Бұл туралы ҚР Білім және ғылым министрі Асхат Аймағамбетов мәлімдеді.
Алматы, NEGE. «Көп заңбұзушылықтар бар. Біліктілік талабына сәйкес келетін мұғалімдер саны аз, жоғары оқу орнының материалдық базасы да ескірген, сабақ беруде заңбұзушылық бар. Сапалы білім алу үшін бұл мәселелерді тиімді жолмен шешуді заңды тұрғыда қолға алмақпыз», – деді министр.
Бұл бес жоғары оқу орнына бұған дейін де министрлік тарапынан ескерту жасалған. Алайда, университеттер сыннан нәтиже шығармаған. Министрліктің ескертуіне құлақ аспаған 12 жоғары оқу орнына айыппұл салынып, бір университеттің ісі сотта қаралмақ. Жыл соңына дейін аталған ведомство тағы 12 университетті тексермекші. Егер олқылықтар анықталса, бірден лицензиялары тоқтатылады. Жалпы, мұғалімдерді даярлайтын, бірақ сапасы сын көтермейтін оқу орындарының саны алдағы уақытта 85-тен 20-25-ке дейін қысқартылуға жоспарланып отыр. Сондай-ақ, министрлік жұмысына салғырт қарайтын оқу орындарының лицензиясын қайтаруға заңға да өзгеріс енгізбек.
