Министр Каспий құбыр консорциумындағы апатты жөндеу жұмыстары туралы айтты
Энергетика министрі Болат Ақшолақов Каспий құбыр консорциумындағы апатқа түсініктеме берді.
Нұр-Сұлтан, NEGE. Оның айтуынша, КТК-дағы жөндеу жұмыстары әзірге басталған жоқ. Бұл ауа райына байланысты.
«Қазіргі таңда КТК 60 пайыздық қуатта жұмыс істеп тұр, айтарлықтай шығын жоқ. Алайда егер жөндеу мамыр айынан кейін де жалғасатын болса, онда шығындар айына 1 миллион тонна жетуі мүмкін», – деді Болат Ақшолақов. Министрдің атап өтуінше, қазір Атырау-Самара мұнай құбыры арқылы квотаны ұлғайту бойынша келісімдер бар және қосымша вагон-цистерналар табылған.
Сондай-ақ, министр «Біз күн сайын өз әріптестерімізбен байланыста болуға тырысамыз. Әзірге ресейлік әріптестеріміз ауа райының қолайсыздығына байланысты жөндеу бригадалары су астына түсе алмай жатқанын хабардар етті. Біз 15 сәуірге дейін күтеміз. Одан кейін өз әріптестерімізді жіберіп, мәселені анықтайтын боламыз», – деп мәлімдеді Энергетика министрі.
