Министр Қашаған дауы қашан аяқталатынын айта алмады
Қашаған кен орнының операторымен жүріп жатқан халықаралық арбитраждың қашан аяқталатыны әзірге белгісіз.
Астана, NEGE. Әділет министрі Ерлан Сәрсембаевтың сөзінше, халықаралық арбитраждық процестердің нақты қанша уақытқа созылатынын алдын ала болжау мүмкін емес. Себебі мұндай істер бірнеше кезеңде қаралуы мүмкін.
«Бұл арбитраж қанша уақытқа созылатынын, қашан аяқталатынын нақты айту қиын. Халықаралық сот дауы болғандықтан, істің өзіндік ерекшеліктері бар және ол бірнеше инстанцияда қаралуы мүмкін. Сондықтан бұл мәселе бойынша нақты мерзім жариялай алмаймыз», – деді министр.
Ал Қазақстан бюджетінен бұл процестерге қанша қаражат жұмсалатыны туралы сұраққа министр халықаралық арбитраждар мен сот процестеріне арналған арнайы бағдарлама бар екенін алға тартты.
«Мемлекеттік орган болғандықтан, біздің бюджет ашық түрде жарияланған. Қазіргі кезде халықаралық арбитраждар мен сот процестеріне қатысты арнайы бағдарлама жұмыс істейді. Жалпы мұндай дауларға 7 млрд теңгеден астам қаражат қарастырылған», – деді Ерлан Сәрсембаев.
Ведомство басшысының айтуынша, қазіргі уақытта Қазақстан шамамен 20-ға жуық халықаралық дауға қатысып жатыр.