Мереке қарсаңында алаяқтар жаңа айлаға көшкен
Жаңа жыл қарсаңында алаяқтар анимациясы немесе музыкасы бар жарқын құттықтау жіберіп, файл арқылы парольдерге, банк карталарына және қосымшалардағы деректерге қол жеткізеді.
Астана, NEGE. Ішкі істер министрлігі өкілдері Жаңа жыл қарсаңында алаяқтар белсенді әрекет ететінін ескертті.
«Алаяқтар қауіпті файлдар тіркелген "жаңа жылдық құттықтауларды" таратып, бағасы әдейі төмендетілген сыйлықтар мен тауарлар туралы жалған хабарландырулар жариялайды. Ақша аударылғаннан кейін байланысты тоқтатады», – делінген ІІМ хабарламасында.
Сондай-ақ олар нарықтағы бағадан едәуір төмен бағада тауар немесе сыйлық ұсынады. Ақшаны шұғыл түрде аударуға көндіреді. Төлем жасалған соң хабарландыруды өшіріп, жауап бермейді.
Алаяқтар жиі жалған аккаунттар мен жасанды пікірлерді пайдаланып, өзін сенімді сатушы ретінде көрсетеді.
Сондықтан полиция қызметкерлері бейтаныс сатушыларға алдын ала ақша аудармауды, пікірлер мен аккаунттың тарихын мұқият тексеру қажет екенін ескертеді.
«Бейтаныс адамдардан келген файлдар мен сілтемелерді ашпай, apk кеңейтімі бар файлдарды бірден өшіргеніңіз абзал», – дейді ІІМ өкілдері.
Полицейлер өзіңізді және қаражатыңызды қорғауға шақырады.
