«Менің атым Қожа» фильмінің жарық жұлдызы дүниеден өтті
Қазақстанның еңбек сіңірген қайраткері, белгілі актер, сценарист, кинодраматург, «Менің атым Қожа» фильміндегі басты рөлді сомдаған Нұрлан Сегізбаев өмірден өтті.
Астана, NEGE. Осыған байланысты Мәдениет және ақпарат министрлігі марқұмның отбасы мен жақын туыстарына қайғыра көңіл айтты.
Ведомствоның хабарламасында Нұрлан Сегізбаевтың қазақ мәдениеті мен өнерінің дамуына елеулі үлес қосқан тұлға екені атап өтілген.
«Ол өз ғұмырын шығармашылыққа, ұлттық руханиятқа арнап, кейінгі ұрпаққа өнеге болатын мол мұра қалдырды. Өнерсүйер жұртшылыққа әлі күнге құндылығын жоймай келе жатқан Абдолла Қарсақбаевтың «Менің атым Қожа» фильміндегі басты рөлімен танымал өнер иесі қазақ кино өнеріндегі дара тұлға болды. Оның экранда жасаған көркем бейнелері отандық өнер тарихында айрықша орын алады.
Нұрлан Санжарұлының жарқын бейнесі, шығармашылық мұрасы мен ғибратты ғұмыр жолы халқымыздың жадында мәңгі сақталады деп сенеміз», – делінген хабарламада.
Айта кетейік, бұған дейін қазақ киносы мен театрының тағы бір көрнекті өкілі Асанәлі Әшімов 88 жасында өмірден өткен еді.
