Мемлекеттік бағдарламамен салынған үйлерден кемшіліктер анықталды
Оралда тұрғындар мемлекеттік бағдарлама аясында салынған үйлердің сапасына шағымданды.
Алматы, NEGE. Зачаганск кентінде бой көтерген баспаналардың кейбірі сын көтермейді. Былтыр тапсырылған тұрғын үйлердің іргетасы жарыла бастаған. Ал балкондарынан жауынды күндері су кетеді, себебі талапқа сай орнатылмаған. Суағарын да тұрғындар өздері қойған. Мұнымен қоса пәтерлерде жылыту жүйесінің есептегіш құралы әлі қосылмапты. Арнайы мониторингтік топ 30-ға жуық үйді аралап, мән-жайды саралады. Тексеріс барысында 40-қа тарта кемшілік анықталған.
БҚО сыбайлас жемқорлыққа қарсы іс-қимыл департаментінің басқарма басшысы Біржан Хайруллин: "Жарылу мәселелері болады ғой жардың. Ондай орындар бар. Әсіресе, үлкен бөлмелер жақтарында, балконға шығатын жақтарында. Жүргізілген әрбір мониторинг бойынша қалалық құрылыс бөліміне кепілдік аясында анықталған кемшіліктерді жою жөнінде ұсыныстар жолдадық", - деді.
