Мемлекетке 4,5 млрд теңге залал келтірген: OrdaMed басшылығы қамауға алынды
Ұлттық қауіпсіздік комитеті фармацевтика саласындағы қылмыстық схема әшкереленгенін хабарлады.
Астана, NEGE. ҰҚК мәліметінше, OrdaMed басшылығы жалған құжаттар арқылы заңсыз преференциялар алған.
«OrdaMed АҚ басшылығы Қазақстан аумағында өз өндірісі бар екені туралы жалған құжаттарды пайдалана отырып, халықтың әл-ауқаты мен денсаулығын қамтамасыз ету үшін аса қажет 28 атаудағы медициналық жабдықты мемлекеттік емдеу мекемелеріне жеңілдетілген шарттармен жеткізу бойынша заңсыз преференциялар алған», – делінген ресми ақпаратта.
Алайда іс жүзінде дайын медициналық жабдық шетелден жеткізілген.
Нәтижесінде мемлекетке 4,5 млрд теңге көлемінде залал келтірілген.
Тінту шаралары барысында OrdaMed АҚ басшылығынан құны 1 млрд теңгеден асатын инвестициялық монеталар тәркіленіп, Interdentica, Erkin Brand және OrdaMed компанияларындағы қатысу үлестеріне тыйым салынған.
«Сот санкциясымен OrdaMed АҚ-ның техникалық директоры, бұрынғы басқарма төрағасы және өндірістік басқарма басшысы қамауға алынды», – деп хабарлады ҰҚК өкілдері.
Қазіргі уақытта сотқа дейінгі тергеп-тексерулер жүргізілуде.
