«Медеуде» тікұшақ ұшуы адамдарға қауіп төндірді
«Қазавиақұтқару» тікұшағы Алматыдағы «Медеу» спорт кешені маңында қауіпті жағдайда ұшып, демалушыларға қауіп төндірді. Оқиға сәті видеоға түсіп, әлеуметтік желіде тарады.
АЛМАТЫ, NEGE. Кадрлардан тікұшақтың жерден бірден көтеріле алмай, қисайып, ағаштардың бұтақтарына тиіп кеткені байқалады.
«Қазавиақұтқару» АҚ мәліметінше, ұшу алдын ала берілген өтінім бойынша ресми алаңнан жүзеге асқан.
— Әуе бортын тәжірибелі ұшқыш басқарды. Ұшар алдында бортмеханик азаматтарға қауіпсіз қашықтықты сақтау қажеттігін ескерткен. Алдын ала болжам бойынша, ұшу кезінде желдің бағыты мен күші күрт өзгеріп, әуе кемесінің тұрақтылығына әсер етуі мүмкін, — делінген ресми хабарламада.
Компания оқиғаға байланысты ішкі тексеріс жүргізіп жатқанын мәлімдеді. Тікұшақты жедел тексерген мамандар техникалық ақау анықтамаған.
