Мәжіліс депутаты Ермұрат Бапи «Офицерлер одағы» мүшелерімен кездесті

Депутат Е.Бапи алдымен «Армия үйінің» әскери-тарихи мұражайымен танысты. Екінші дүниежүзілік соғыс тарихын, соғысқа қатысқан қазақстандық қаһармандардың тағдырын қамтитын экспонаттарға бай мұражай көпшіліктің көңілінен шықты. Мұражайда тіпті қытайлық туристер де көптеп жүргенін байқадық.

«Офицерлер одағы» ҚБ төралқасының төрағасы, генерал-майор Махмұд Телеғұсов депутат Ермұрат Бапиды бірлестік жұмысымен таныстырып, бірқатар ұсыныс айтты. Нақтылай түссек, бұл кездесуде Қазақстан әскерінің қазіргі жай-күйі, әскердің көңіл көншітпейтін дайындығы, офицерлер дайындау мәселесінің кемшіліктері, алғашқы әскери дайындық, әскердегі бірін-бірі қайталайтын тексерудің көптігі, соның салдарынан офицерлердің жауапкершілік алудан қорғатыны, дендеген жемқорлық мәселесі, тағы да басқа түйткілдер ашық талқыланды.

Мәжіліс депутаты Ермұрат Бапи заң шығару мәселесінде, заңдарға түзетулер мен толықтырулар енгізу жұмысында «Офицерлер одағының» ұсыныстары ескерілетінін және алдағы уақытта тағы да кездесіп, бірқатар мәселелерді пысықтап алғысы келетінін айтты.

Жиын соңында генерал-майор М.Телеғұсов депутат Е.Бапиды «Кеңес одағының батыры, Халық Қаһарманы, Армия генералы Сағадат Нұрмағамбетов» мерейтойлық медалімен марапаттады.