Мәжілістің жалпы отырысы бір минуттық үнсіздікпен басталды
Мәжілістің бүгінгі жалпы отырысы Қарағанды облысында қаза болған кеншілердің құрметіне бір минуттық үнсіздікпен басталды, деп хабалайды Мәжілістің баспасөз қызметі.
Алматы, NEGE. «3 қарашада Қарағанды облысы Шахтинск қаласындағы шахтада болған апаттың салдарынан бес адамның қаза тапқаны бәрімізге белгілі. Барлық депутаттық корпус атынан қайтыс болған кеншілердің отбасылары мен жақындарының қайғысына ортақтасып, көңіл айтамын», – деді Төраға Ерлан Қошанов.
Жарылыста қаза тапқан азаматтарды еске алу құрметіне бір минут үнсіздік жарияланды.
Жалпы отырыста Палата Төрағасы жақында мандатын тапсырған Айбек Паяевтың орнына Дмитрий Максимович Легкийді таныстырды. Жаңа депутат Орталық сайлау комиссиясы Қазақстан халықтық партиясы атынан тіркелді.Мәжілісмендер жаңа әріптестерін қабылдауға бірауыздан «жақтап» дауыс берді, депутат Қазақстан халқына салтанатты түрде ант берді.
«Барша депутаттардың атынан құттықтаймыз. Жұмыстарыңызға табыс тілейміз», – деді Төраға.
