«Мәсімов кассациялық шағым түсірген жоқ» – Жоғарғы сот
Бұл аптаның басты жаңалығы Кәрім Мәсімов болған сыңайлы. Өйткені «Кәрім Мәсімов Президенттен рақымшылық жасауды сұрапты» деген әңгіме ақпарат айдынын әбден шаңдатты.
Мәсімовтің соты жабық өткені белгілі. Сол себепті де сот туралы ешқандай дерек жоқ. Ол кінәсін мойындады ма, жоқ па, ол жағы да белгісіз. Қысқасы, белгісіз дүние көп бұл істе.
«Рақымшылық» туралы гу-гуден соң іле-шала ҚР Президенті жанындағы Рақымшылық жасау комиссиясының мүшелері «мемлекетке опасыздық жасады және билікті басып алмақ болды» деген айыппен сотталған Ұлттық қауіпсіздік комитетінің бұрынғы басшысы Кәрім Мәсімовтен ешқандай өтініш түспегенін айтты.
NEGE порталы бұл әңгіме тарамай тұрғанда-ақ осы сұрақтарға жауап алмаққа Жоғарғы соттың төрағасы А.Мерғалиевке ресми сауал жолдаған. Онда біз Сот кабинетіндегі дерекке сүйеніп, Мәсімовке қатысты істің сотқа қашан түскенін, арызды кім түсіргенін, онда не айтылғанын сұрағанбыз. Ресми сауал мерзімінің соңғы күні Жоғарғы соттан жауап келді-ау, әйтеуір.
Жауап келгенін қайтейік, Сот әкімшісі жетекшісінің орынбасары Б.Жоламанов былай деп қысқа қайыра салыпты: «К.Қ.Мәсімов кассациялық сотқа шағымданған жоқ».
ҰҚК-нің бұрынғы басшысы К.Мәсімовке қатысты кез келген дерек қоғамда қызу талқыланатыны белгілі. Сондықтан да ендігі жерде істі құпиялай берудің еш қажеті жоқ сияқты.
«Мәсімов үйінде қарбыз жеп, қорқор тартып отыр екен» деген сияқты түрлі алыпқашпа әңгімелерге жол бермеу үшін де...
