«Мәселе жабық»: Сәпиев орынбасарымен арадағы жанжал туралы
Қарағанды облысының дене шынықтыру және спорт басқармасының басшысы Серік Сәпиев өзінің орынбасары Дәурен Есімхановпен төбелесті деген ақпаратқа қатысты пікір білдірді.
Астана, NEGE. Сәпиевтің айтуынша, ол мемлекеттік қызметші ретінде әдеп нормаларын қатаң сақтайды және рингтен тыс жерде күш қолданбайды.
«Өз мүмкіндігімді жақсы бағалаймын және әрбір іс-әрекетім үшін жауапкершілік арқалайтынымды толық түсінемін. Сондықтан қандай да бір арандатушылықтарға ермеймін», – деп жазды ол Instagram парақшасында.
Сәпиев жанжалдың неден басталғанын түсіндірмеді. Тек мәселе жабық екенін атап өтті.
Айта кетейік, желіде бокстан Олимпиада чемпионы Серік Сәпиев пен орынбасары – самбодан әлем чемпионы Дәурен Есімханов төбелескені туралы ақпарат пен соның видеосы тарады. Полицейлер қылмыстық іс қозғалғанын мәлімдеді.
Астана дзюдо федерациясының президенті Айдар Махметовтың айтуынша, екеуара дау қызметтік мәселелерге байланысты туындаған.
